يوميات طبيب حائر

انا طبيب حائر : بقلم ام مؤمن
صح ما أقول
.............

ادعوا له بالرحمة يرحمكم الله
هذا القول لا انقطع عن ترديده عند حدوث حالة وفاة فى المستشفى .. عندما ياتى مريض فى حالة احتضار .
و لكن المشهد التقليدى .. ان يقوم الاقارب (اولاده . زوجته … اى حد) بالصراخ على الاطباء و التمريض .. الحقوه يا اولاد ال… و تلاقى مليون فتوى .. اديله اكسجين .. اعمله تنفس صناعى .. اعمله كهربا فى القلب ..

يا عباد الله سيبونا نشتغل… تلاقى اللى واقف فوق دماغك مش سايبلك مساحة تتحرك .. و لا اللى ماسك ايديه او رجليه يدلكهاله .. يا اخى عايزين نتحرك .. مرة من المرات واحد رفض يسيب رجل قريب له و احنا حندى صدمة كهربا .. يا اخى حاسب .. رد : مالك صالح (يعنى ملكش دعوة . … و تم اعطاء صدمة الكهربا .. و اخونا الفاضل اتكهرب ….

اللى يضايق اكثر .. ثقافة السب .. الناس عندها قناعة انك لو سبيت الدكتور او الممرضة يشتغل احسن …
سبحان الله لو الدكتور مش بيخاف الله حيديك علاج لا يضر و لا ينفع .. او يديك علاج يعذبك بالاعراض الجانبية ..
الاحترام المتبادل … مهم

نرجع لموضوعنا .. ادعوله بالرحمة يا اخواننا .. ده وقت قبض الروح .. و فيه ملائكة تؤمن على ما تقولون .. فادعو بالرحمة
الكارثة بجد ان الناس ليس عنده ما تقوله . يعنى اكثر من مرة اقول لواحد ادعيله .. يقرا الفاتحة .. اية الكرسى ؟؟؟
ادعيله يا اخى ..
نحن فى حاجة الى ان نتعلم كيف نستعد للقاء الله … ليس لنا فقط بل لمن يعيشون حولنا…
اللهم انى اعوذ بك من الغفلة ..

بقلم ام مؤمن