الزمن الجمييييييييل

*الزمن الجمييييييييل*

كان زمان الدنيا سمحه
وأحلى مافيها البساطه
الف نفاج فوق بيوتهم
والزياره بدون وساطه
كانو كيمان من محنه
وكانوعايشين إنبساطا
حله كامله ورادي وااااحد
تلقى صوت الموجه جاطا

ريكة الكسره الكبيره
للفريق كافيه وزياده
الدواوين فاتحه شارع
والجميع عايشين سعاده
تلقى جد الحله واااااحد
ورايو عندالناس قلاده
وإن مرقت بدون تصابحو
بتبقى خارق ليك عاده

المسلسل ليه نكهه
ويمشو ليه الناس مسيره
وياسلام لو يوم تصادف
وتحضر الحلقه الاخيره
البنيات والوليدات والعجائز
والخلق بالحيل كتيره
وكلهم في فد سباته
من اهل حبان وجيره

وإن جا جواب من مسافر
تلقى كل الحله تفرح
ويندهو الزول البيقرا
ولي الحروف الفيها يشرح
واي مفرده في الرساله
بتمسح الاحزان وتطرح
ما الرساله ملانه إلفه
ومابتلاقي كليمه تجرح

لمبة الفانوس تنور في الرواكيب الحنينه
والخلاص اوضاعو رايقه
بتلقى جايب ليو رتينه
ياسلام العيشه سمحه
واي حاجه تشوفو زينه
والعلاقات ماها هشه
والصلات كانت متينه

والمغارب كان جميله
واللبن كان جد حكايه
الوليدات بي الجرادل
واي بت تلفح عبايه
وشايله بستله وتسابق
وجاريه وقعت الغطايه
ولاحقه للشاي المقنن شان
مفور في اللدايه

الليالي وريفه جدآ
والقمر في الرمله ضاوي
وديمه حبوبه بتلولي
وتحكي تشرح في الحكاوي
فاطمه شالا الغول وروح
وبس ميويه تدور تكاوي
سمحه حبوبه وحنينه
ويومي نايمين بي الحجاوي

وإن في زول في الحله عرس
كل بت في الحي تفصل
اما ساعة الحفلى تبدا
يطلع الفارس يوصل
كوم من البنوت يقودن
ولي العرس ليهن يحصل
طالما الراجل معاهن
مافي زول ليهن برسل

اللعب كان حجله سمحه
هودنا وسيجه وحفيره
كان شليل جوانا رايح
ولعبه ماحبينا غيرا
والخريف كان حل جانا
نفرح ونقول يامطيره
يلا كبي المويه سرعه وكنا
نطلع ليها سيره

اي بيت بي مشلعيبو
وقربه في اقرب مكانه
تلق سحاره بتخزن وباقيه للناس كم خزانه
اما ساعة القهوه تلقى
مستفه بيوتهم ملانا
وكل زول متى مايجيهم
يلقى مختوت ليه خانه